咁快就到咗辛丑牛年🐮。同大家講聲新年快樂、恭喜發財🧧！
鼠年🐭開始到而家，全世界🌍冚唪唥封哂。我哋好乖，守哂規矩，絕大部分活動都搬咗上網🖥️。多得大家體諒，俾面參加。尤其上個月個旗艦活動Academic Symposium 2021得大家積極參與，唔少朋友山長水遠由香港甚至美國「過嚟」參加。
我哋協會個名有「學者」兩個字，其實係勉勵大家互相支持，發揚學者天職，對一整代嘅知識傳承承擔責任🎓。呢幾年香港發生咗太多太多事，唔洗多講，我地好應該盡自己力量去保存真理、傳揚知識、培育人才。香港有今日成就，全賴世世代代香港人奮發努力💪，為自己、為家人、為摯愛，日夜拼搏。希望本會同人會互相合作，建設香港。呢個地方保存真實而寶貴嘅東西文化，無論由文化、歷史、經濟、政治邊一個層面嚟講，都對世界舉足輕重，係好值得所有人去珍惜同愛護佢。就好似我哋有幸嚟到牛津讀書，識到五湖四海嘅人，好應該做個好榜樣，既為英國帶嚟優秀嘅遠東文化🌏，亦為香港帶返世界級嘅知識學問。
成個世界都俾病毒搞到亂哂，關又封城又鎖⛔。不過，呢個亦係改變舊習慣嘅最好時機。虛擬世界發展多年，已經好成熟，而而家互聯網就幾乎係人類社會經濟賴以運作嘅惟一依靠。Work from home⛰️、上網返學等等，新生活模式已經嚟咗，我哋都係時候可以反省吓以前嘅生活同時間安排，以至可以諗下點樣改變社會。響呢個大變局既世代同香港，我哋更需要群策群力，做好學問，並且為人類福祉謀求前路。
新一年啦，我哋再㊗大家身心康泰、闔家平安。
介立山房 