牛津大學香港學者協會會長辛丑(2021)新春文告-粵文


咁快就到咗辛丑牛年🐮。同大家講聲新年快樂、恭喜發財🧧!

鼠年🐭開始到而家,全世界🌍冚唪唥封哂。我哋好乖,守哂規矩,絕大部分活動都搬咗上網🖥️。多得大家體諒,俾面參加。尤其上個月個旗艦活動Academic Symposium 2021得大家積極參與,唔少朋友山長水遠由香港甚至美國「過嚟」參加。

我哋協會個名有「學者」兩個字,其實係勉勵大家互相支持,發揚學者天職,對一整代嘅知識傳承承擔責任🎓。呢幾年香港發生咗太多太多事,唔洗多講,我地好應該盡自己力量去保存真理、傳揚知識、培育人才。香港有今日成就,全賴世世代代香港人奮發努力💪,為自己、為家人、為摯愛,日夜拼搏。希望本會同人會互相合作,建設香港。呢個地方保存真實而寶貴嘅東西文化,無論由文化、歷史、經濟、政治邊一個層面嚟講,都對世界舉足輕重,係好值得所有人去珍惜同愛護佢。就好似我哋有幸嚟到牛津讀書,識到五湖四海嘅人,好應該做個好榜樣,既為英國帶嚟優秀嘅遠東文化🌏,亦為香港帶返世界級嘅知識學問。

成個世界都俾病毒搞到亂哂,關又封城又鎖⛔。不過,呢個亦係改變舊習慣嘅最好時機。虛擬世界發展多年,已經好成熟,而而家互聯網就幾乎係人類社會經濟賴以運作嘅惟一依靠。Work from home⛰️、上網返學等等,新生活模式已經嚟咗,我哋都係時候可以反省吓以前嘅生活同時間安排,以至可以諗下點樣改變社會。響呢個大變局既世代同香港,我哋更需要群策群力,做好學問,並且為人類福祉謀求前路。

新一年啦,我哋再㊗大家身心康泰、闔家平安。

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: